六位朋友來電

跟朋友吃過飯後，在旺角閒逛。已很久沒有認真在旺角逛街，閒時看看鞋，看看衫，也算賞心樂事呢。期間接到六位朋友來電。

肥田：「喂，係邊呀？」
我：「旺角。咩事呀？」
肥田：「好耐冇見，掛住你咪打比你囉。我都係旺角喎。」
我：「邊度？」
肥田：「先達呀。去飲野丫！」
我：「有朋友係度喎，下次先啦。」
肥田：「咁你幾時得閒出黎呀？」
我：「搵日啦。」
肥田：「X你！成日都係呢句，搵你幾十次都唔得閒。」

遠：「去旺角有咩好食呀？」
我想：「呢句對白好似我平時用開架喎。」
我：「你幾點出到旺角呀？」
遠：「差唔多九點啦。」
我：「咁去潮樓囉，九點後好似半價。」
遠：「半價咁抵，咁去潮樓lu。」
我想：「上次去好似係半價，而家唔知呢。」
(上次去潮樓好像是一年多前的事。)

二汪：「係咪星期日呀？」
我：「係呀，約定你嘛。」
二汪：「其實而家出黎都得。」
我：「哦！係喎！人地出左trip喎！不過我而家有朋友係度。」
二汪：「唔係呀，頭先同朋友係沙田食完飯咋。」
我想：「最近咁多人鐘意去沙田食飯呢！」
(話說朋友C昨天同樣是到沙田吃晚飯。)

佳佳：「你係咪有朋友係百老匯做呀？」
我：「係呀，買咩呀你？」
佳佳：「買相機之嘛，你幫我話聲佢知我一陣落去搵佢丫！」
我：「咁等我打比佢睇下佢有冇返工先，一陣覆你！」
我：「佢係旺角M記隔離落樓個間喎！」
佳佳：「我咪係旺角囉。」

同一時間，四人來電，三人在旺角。在街上，我故意舉目四顧，在這細小之地，卻未見一人踪影。欠緣份嗎？我想不是。要是有心，必能找到的。

耀叔：「聽日你打算幾點去呀？」
我：「七點幾啦。」
耀：「咁聽日你係屋企出發。」
我：「係呀。」
我想：「佢係咪想講一齊去呀？」
耀：「我聽日要返工，大概三點幾放工。」
我：「咁聽日一齊去啦，我出門口打比你。」
耀：「我仲有一樣野想問，你聽日著咩衫去呀。」
我：「應該裇衫牛仔褲掛。」
耀：「去飲唔係一定著恤衫西褲架咩？」
我：「咁你咪著恤衫西褲囉。」

小氣鬼：「係邊呀？」
我：「返緊屋企。」
小氣鬼：「你聽日幾點到呀？」
我：「七點幾啦！」
小氣鬼：「早D去陪我啦。」
我：「冇理由要我早D黎同你一齊悶掛，你自己悶好啦。」
我：「阿Ray 幾點去呀？」
小氣鬼：「你唔知咩？」
我想：「乜都唔講又會知呢？」
小氣鬼：「上次彩虹問佢個陣，佢話唔得閒，所以無派帖比佢呀。」
我：「早知我又話唔得閒啦。」

朋友結婚，不免大破慳囊，雖然口裡喊窮，但內心的祝福卻是衷心。