一場誤會

話說幾天前同事在我身邊走過，無意中聽到我講電話。
同事：「你講電話把聲好唔同呀，原來你都可以咁有禮貌！」

電話中對答大概如下。

前半段(同事未路過前)
Sales：「唔好意思呀，個32部電腦要下星期一先送到呀。」
我：「唔緊要，就下星期一啦！」
Sales：「咁我地需唔需要幫你安排師傅安裝？」
我：「要呀，咁幾時安排到呀？」
Sales：「最後都要下星期六喎，唔知有冇問題呢？」
我：「可唔可以早幾日呢？」
Sales：「唔好意思呀任生，真係安排唔到。」
要發招了。
我：「你星期一送貨黎，我要搵間房放，你要我放成個星期先黎安，咁我間房唔洗用啦！」語氣比之前十個平淡加重了少許。
Sales：「或者我再幫你安排下，睇下可唔可以早幾日丫，我轉頭再覆你丫！」
我：「我星期一收到貨，但你地一日未攪掂，張invoice我係唔會簽架。」
Sales：「原來星期二師傅有d時間，咁我叫佢地幫你做左先啦！」

後半段(同事路過)
我：「哦！就咁決定，就星期二啦。但係幾點到呀？」開始轉了顏聯武腔。
Sales：「師傅大概十點會到，唔知任生仲有冇其他問題呢？」
我：「無喇，真係唔該晒你張小姐！」
Sales：「有咩問題隨時打比我丫！」
我：「好，唔該你，拜拜。」

果然沒錯，在同事眼中的我，的確如我所想。平時粗聲粗氣，開口埋口叫人死開，人家說好，我偏說不好，經常同人作對，仲間中玩下針對，同事講拜拜，我叫他安心去，包拗勁專員一名。

可能，這次同事會對我改觀。但事實，他誤會了，他本來認識那個才是我。